Til hamingju með daginn í gær Berglind mín. Vona að þú hafir átt góðan dag
Águst

Til hamingju með daginn elsku Svandís mín, ég bíst að vísu ekki við að þú lesir þetta þar sem enginn virðist lesa þessa síðu okkar   En ég prufa samt. Kær kveðja frá DK. Þinn Hallbjörn

Til að sýna að ég sé ekki búin að gleyma þessari síðu ákvað ég að setja inn nokkur orð.

Það er bara gott að frétta héðan frá Álaborg. Hér snjóar og snjóar og okkur líður eins og það hafi snjóað stanslaust síðan fyrir jól. Það er þó ekki svo slæmt en það hefur ekki tekið upp snjó síðan um 18. des og svo bætir í öðru hvoru. Til dæmis núna er danskur snjóstormur, búið að kyngja niður snjó frá því í gær. Allir Danir inni vegna veðurs en ég ákvað að skella mér í sund með strákana. Það bítur sko ekkert á okkur Blönduósingana/Íslendingana.
Það mætti þó fara að vora. Mótorhjólið er búið að vera í geymslu síðan fyrir jól og því mikið  að gera að skutlast með fjölskyldumeðlimi fram og tilbaka. Það lendir víst mest á mér þessa dagana sem ég finn þó mest fyrir þegar Birna á að mæta i vinnu kl. hálf sjö eða sjö. Þá er nótt og það hentar mér bara alls ekki að fara á fætur til að skutla frúnni. Þetta var miklu skemmtilegra í haust þegar hún fór bara sjálf á hjólinu og ég rétt rumskaði þegar hún kvaddi.

Svo á að fara að ferma elsta barnið og erum við að skoða þau mál þessa dagana. Hvernig fermir maður í fyrsta skiptið? Ég átti að fara með Tómas í messu í gærkvöldi en henni var frestað vegna veðurs fram í lok maí þ.e. eftir fermingu, þannig að presturinn fær líklega ekki að sjá mig í maí

Kær kveðja frá DK, ykkar Hallbjörn

BÖÐVAR Á AFMÆLI Í DAG...TIL HAMINGJU MEÐ DAGINN BÖÐVAR!!!
ER EG EINI SEM LES ÞETTA BLOGG ÞESSA DAGANA 
KV ÁGÚST

hæhæ
Fyrir þá sem komust ekki í hádegismatinn í síðustu viku, þá var það tilkynnt að annað barn væri á leiðinni. Við vorum í sónar í gær og allt lítur þetta rosalega vel út. Áætluð koma barnsins er 12.júní næstkomandi (sem er augljóst), en það er nú líklegt að íbúar á Hólabrautinni hafi frétt af því
Áki minn er orðinn rosalega stór og skemmtilegur. Ég ætla að segja sömu sögu og eg sagði í síðasta hádegishitting. Það var einn morguninn að Alma mín var inn á baðherbergi að losa sig við morgunmatinn, morgun ógleðin að segja til sín. Áki stóð hinu megin við dyrnar á ganginum og fór að herma eftir mömmu sinni, hann hóstaði og hóstaði og hlóg svo á eftir, svo byrjaði mamma hans aftur, þá byrjaði hann að hósta og hlægja....drengurinn algjör snilli 
Jæja, en hvar eru allir góðu pennarnir sem hafa verið svo dulegir að skrifa inn á þetta blogg? Eigum við ekki að setja líf í þetta aftur?? Einhverjar fréttir frá Aalborg eða Hólabrautinni??
kv Ágúst 

Til hamingju með daginn Maggi minn.
Kv Ágúst 

hvernig gengu nefndarstörf um síðustu helgi???

Breathe
No Line On The Horizon
Get On Your Boots
Magnificent
Beautiful Day
Mysterious Ways
I Still Haven't Found What I'm Looking For
Stay
Unknown Caller
Unforgettable Fire
City of Blinding Lights
Vertigo
I'll Go Crazy If I Don't Go Crazy Tonight (Remix)
Sunday Bloody Sunday
Pride (In The Name of Love)
MLK
Walk On
Where The Streets Have No Name
One
Bad
--------
Ultraviolet
With Or Without You
Moment of Surrender

Þetta eru þau lög sem U2 tóku í Millenium Stadium í Cardiff á laugardögskvöldið síðastliðna. Og því líkir tónleikar, sviðið, show-ið, hljóðkerfið, 88.000 manna kór og svo maður gleymi nú ekki frábærum listamönnum. Ég var rétt í þessu að hlusta á U2 disk í græjunum og þegar lögin koma sem voru spiluð á tónleikunum þá fæ ég svona ánægjuhroll. Ég á ekki til orð til að lýsa þessum tónleikum nóguvel, þið verðið bara að fara
En til að ég komi nú aðeins með ferðasöguna, þá var lagt af stað frá Álaborg til Árhúsa kl 0700 á föstudagsmorguninn. Í Árhús var stokkið upp í flugvél RyanAir og það er upplifelsi út af fyrir sig,  það er sko engin sæti tekin frá, bara fyrstur kemur fyrstur fær. Allar flugfreyjur frá fyrrverandi austantjaldslöndum og flugmennirnir held ég bara líka, minnsta kosti var erfitt að skilja þá eins og flugfreyjurnar og hreimurinn sagði allt.
Svo var lent á Stansted flugvellinum í London, leygður bíll og keyrt til Swindon sem er svona mitt á milli London og Cardiff.
Þetta er kannski of mikil einföldun á hlutunum "leygður bíll og keyrt til Swindon". Vinstri handar umferð, stýri hægra megin, beinskiptur bíll og ég bauðst til að keyra.
Til að gera langa sögu stutta þá var mikið hlegið af mér um helgina og þetta er sko ekki auðvelt
Á leiðinni til Swindon voru miklar umferðartafir og ferðalangarnir orðnir svangir, tekin var sú ákvörðun að keyra af hraðbrautinni og finna mat. Ekki vorum við mikið að lesa á skiltin þegar keyrt var af hraðbrautinni og þegar við komum inn í næsta bæ blasti við okkur mikill kastali, stuttu seinna áttuðum við okkur á því að bærinn heitir Windsor Svo var keyrt áfram til Swindon, skráðum okkur inn á hótelið, svo út að borða á Indverskum stað. Ástæðan fyrir því að Swindon varð fyrir valinu hótellega séð var að öll hótel voru uppbókuð í Cardiff í byrjun júní og næstu bæjum líka þannig að hótel í Swindon var næst. Fínt hótel og bærinn ágætur.
Á laugardagsmorguninn var byrjað á því að kíkja í búðir í Swindon og svo haldið af stað til Cardiff, höfuðborgar Wales. Það gekk áfallalaust og einnig að finna bílastæði niðri í bæ. Að vísu var umferðin að þyngjast og við vorum alveg á réttum tíma að finna stæði þarna um tvöleytið, U2 átti sko að byrja spila 20:20 um kvöldið. Cardiff var full af fólki út af tónleikunum en tókst okkur að finna borð úti við pöbb og fá okkur að borða. Svo var bara slappað af. Um 17:30 fórum við að rölta að Millenum Statium en upphitunar böndin áttu að byrja um 17:00. Þau voru svo sem ágæt, en ekkert í líkingu við það sem á eftir kom.
Svo byrjuðuð U2 og það var bara VÁ, stundum hætti Bono að syngja í miðju lagi og lét kórinn syngja og 88.000 manna kór hljómar sko rosalega, bara gæsahúð
Eftir 2 tíma af gæsahúð var haldið til Swindon aftur í gegnum biðraðirnar, en það hafðist á endanum.
Svo gekk sunnudagurinn í garð og við Birna vorum enn brosandi hringinn eftir tónleikana. Þar sem miklar umferðartafir voru á hraðbrautunum á föstudeginum stakk ég upp á því að keyra sveitavegina til Oxford svo til Milton Keynes og enda á Stansted flugvellinum. Sveitavegirnir í Englandi eru svolítið merkilegir þeir eru valla fyrir einn bíl og hvað þá tvo, en þetta tókst allt og við komumst til Oxford. Oxford er mjög falleg borg og var eitt svona stutt stopp ekki nóg fyrir þá borg. Milton Keynes var næst og verð ég að viðurkenna að þegar ég skipulagði þessa tvo punkta (Oxford og Milton Keynes) í bókabúðinni í Swindon kíkjandi í kortabók, þá hafði ég ekki hugmynd um hvað Milton Keynes væri, annað en nafn á korti. Svo þegar við komum til Milton Keynes blasti við okkur ekkert, og ekkert sem benti til neins nema skilti sem stóð á Milton Keynes. Þannig að Milton Keynes er enn sem komið er ráðgáta í mínu höfði
Á endanum komumst við til Stansted og flugum heim til DK.
Frábær ferð á enda og frábærir tónleikar, U2 eru komnir á nýjan stall í mínum huga.
Kv Hallbjörn

TIL HAMINGJU MEÐ AFMÆLIÐ Í GÆR KÆRI HALLBJÖRN
KV AGUST

Annað kvöld klukkan 20 og á laugardaginn klukkan 17.
Brúðkaup Fígarós og Leyndarmál Súsönnu á morgun, en bara brúðkaupið á laugardag.
Væri gaman að sjá ykkur þar
M

Fann með mér skyndilega löngun til að skella inn nokkrum línum hingað

Tíminn líður afskaplega hratt hér í Álaborg og þá líklega annarsstaðar líka. Börnin telja dagana þangað við komum til Íslands en við Birna erum öllu rólegri. Fer að líða að því að töskur verði dregnar fram og raðað í. Kem nú kannski ekki mikið nálægt því nema sem stuðningur og kannski við að setjast ofan á töskur til að loka þeim. Birna hefur aðeins kíkt í hina frægu verslun h&m með innkaupalista frá ættingjum heiman að. Það er jú vitað að ekki eru til föt á Íslandi vegna kreppunar eða kannski eru það h&m fötin sem heilla.
Það verður þá pláss í heimleiðinni fyrir þann óþarfa sem verður verslaður á Íslandi. Innkaupalisti hefur verið uppi við í nokkurn tíma svo það er eins gott að það verði pláss fyrir t.d. lýsið, cocoa puffs og fleiri hluti sem hér þykir spennandi að fá öðru hvoru. Birna segist ætla að fela sælgætið sem verður verslað.  Ég get þó verið afskaplega fundvís svo ég held að það sé bara sniðugra að sleppa því að versla íslenskt nammi.
Ágúst kom hingað um helgina með konu og barn sem var mjög gaman. Reyndum að haga okkur vel eins og alltaf þegar gesti ber að garði.
Bendi ykkur á að gsm-síminn sem við verðum með á Íslandi má finna á ja.is undir mínu nafni

Ég mætti með fjölskylduna á Húnavershátíð síðustu helgi.  Það rifjaði upp óljósar minningar frá því í firndinni, sérstaklega þegar tengdapabbi (sem ég þekkti ekki þá) sagði viðstöddum sögur af því þegar hann keyrði líkvagninn um grundir Húnavers og kom snemmdauðu fólki í skjól.  Mér tókst reyndar að sannfæra hann um að ég hefði ekki verið einn þeirra sem þáðu far, eða, ég held alla vega að hann hafi sannfærst.

Merkilegar svona samkomur, aldrei verið minn tebolli einhvern veginn.  Sjálfsagt Uppsala Gíslinn í mér, félagsfælni sem verður að skrifast á einangrun í æsku, eða eitthvað.
Reyndar rámar mig í að hafa spilað í hljómasveitakeppni þegar fyrsta hátíðin var haldin, man ekki hverjir voru með mér í hljómsveit eða hvað var spilað, man þó að mér var svo kalt að ég gat varla spilað.  Man einhver hverjir voru í bandinu?

Ári síðar (eða tveimur?) ætlað Piflon Kyd að troða upp og lá mikill undirbúningur að baki.  Hins vegar urðu bassaleikarinn og trymbillinn fyrir því óláni að velta Saab 900 bíl föður þeirra í lausamöl í Hrútafirði á leið í fjörið.  Það setti talsvert strik í reikninginn og var þátttaka slegin af.  Allt þetta hafði svo þær afleiðingar að söngvarinn (öðlingurinn Hjörvar) var dreginn í heyskap.  Það er oft stutt á milli sveitamennsku og landsfrægðar.

Ég veit ekki af hverju, en ein af skírari minningunum frá Húnavershátíðum er um eina vinkvenna Berglindar (nafni vinkonunnar viljandi haldið leyndu af tillitsemi við fjölskyldu fórnarlambsins) sem hafði þann sið að ganga með djús í nestisbrúsa um hálsinn.  Á rangli sínu á svæðið, þegar nokkuð var liðið á kvöldið og djúsinn, vildi ekki betur til en svo að vinkonan hnaut um fæturna á sjálfri sér og datt kylliflöt fram fyrir sig með þeim afleiðingum að nestisbrúsinn veitir henni bylmingshögg undir bringspalirnar.  Vinkonan missti andann og héldu viðstaddir nokkra stund (og ekki síst hún sjálf) að hún væri búin gefa upp öndina (sem er reyndar nokkuð nákvæm lýsing á atburðum ef út í það er farið).  Allt fór vel að lokum, eða ég man alla vega ekki betur...

En aftur í nútímann.  20 stiga hiti, sól og blíða á laugardaginn.  Skroppið í veiði, yndislegt alveg.  Dóttirin veiddi 5 stk, sonurinn 2 og ég 1.  Því miður nota börnin ennþá veiðiaðferðir sem virka vel (spúna og maðka) þannig að við þurftum að éta aflann.  Ég þarf endilega að kenna þeim gleðina við að veiða (lítið) með flugu.

M

En ég er greinilega ekki einn um lausatök í bloggritun.
Mér datt í hug, svona í tilefni þess að það er komið sumar og svona, að stinga niður hinum rafræna fjaðurstaf og athuga hvort andinn vill koma yfir mig.

Allt svo, margt búið að gerast, sei sei já.  Þegar þetta er skrifað er dótturin í Olumouc, sem ku vera borg í Tékklandi.  Þar er hún á kórferðalagi, tekur þátt í kórakeppni á laugardaginn.  Allt mjög spennandi og skemmtilegt og ekki laust við að manni finnist hún fullorðnast hratt þennan veturinn.

Við hin skruppum í sveitina um síðustu helgi, kíktum á lömbin og vígðum tjaldið sem verður notað óspart á ferðalögum um Ísland í sumar (skemmtilega steríotýpískt eitthvað). En við hlökkum öll til að skrölta um landið og prófa þennan ferðamáta fyrir alvöru.

Í ágúst dregur svo til tíðinda því þá verð ég þátttakandi í óperuverkstæði sem verður haldið í Hafnarfirði, af sama fólki og skipulagði námskeiðið sem ég sótti til Austurríkis síðasta sumar.  Þarna verða um 15 uprennandi stórstjörnur og því ástæða til að koma og tékka á okkur.

Annars er þetta svo sem allt við keimlíkt heygarðshorn og fyrr. Árin koma og fara í rólegheitum og það er ærið verkefni í sjálfu sér að fylgja með og taka þátt í lífinu sér og öðrum til skemmtunar.

Fyrst ég er orðinn svona heimspekilegur:  Finnst ykkur ekki skrítið hvað hagfræði er orðin vinsæl?  Veltum þessu aðeins fyrir okkur.  Í okkar heimshluta er nægur matur, hreint vatn, orka, heilsugæsla, menntun, lýðræði, friður (svona til þess að gera), frelsi einstaklingsins, etc. etc. Þannig að erfiðasta viðfangsefni okkar þessa dagana er...? Jú mikið rétt, stýrivextir.

Spáum aðeins í það. Hvað eru stýrivextir? Jú, ákvörðun Ríkisins um hvað það kostar okkur mikið að leigja peninga af seðlabankanum, við eigum nefnilega ekki seðlana í veskinu okkar, við erum með þá á leigu.

Ah well, ég nenni ekki að spá meira í það. Guði sé lof að ég lærði ekki hagfræði...

Bestu kveðjur til ykkar allra og meðan ég man, takk fyrir síðast og takk fyrir skemmtilegt heimboð Gústi og Alma :-)

M

Já, ég ætla að blogga, kannski komin tími til

Allt gengur sinn vanagang hér í Álaborg. Ég ásamt börnunum i skólanum daglega og Birna að vinna.
Sumarið er komið hér og að því tilefni fórum við í útlegu núna um helgina. Held að þetta sé fyrsta skiptið sem ég fer í útilegu í apríl. Hitastigið þessa dagana nær 20° svo þetta var í fínu lagi. Það var ansi kalt fyrri nóttina en hverju er maður ekki vanur á Íslandi. Það kól enginn svo okkur var ekki meint af.
Kosningavakan fór fram í gegnum síma svo við fengum tölur frá Íslandi öðru hvoru.
Ég er núna að vinna að Bachelor verkefninu  sem gengur vel og verð ég líklega komin í sumarfrí í lok júní eins og grunnskólarnir. Ekkert ákveðið með ferðalög ennþá en býst við að við förum í eina og eina útilegu enda um að gera að njóta þess því aðstaðan á tjaldstæðum hér er frábær. Ætli við seljum ekki bara útilegudótið þegar við flytjum heim. Verðum orðin svo góðu vön að tjaldstæðin á Íslandi standist ekki kröfur okkar.

Lifið heil

Nú er ég komin í páskafrí frá nemendum en ekki alveg frá vinnu... Alltaf eitthvað sem maður getur bardúsað hér heima og eins sé ég fram á að fara í skólann eitthvað til að þrífa upp skítinn eftir mig...

Ég var að komast að því að það eru aðeins um 7 vikur eftir af kennslu þetta skólaárið og ég á eftir að gera svo óendanlega mikið með nemendum mínum - eins og alltaf. Sumarskemmtun er strax í vikunni eftir að páskafríi lýkur og nú er ég umsjónarkennari í 7. bekk og að venju sjáum við um stærsta atriði hennar. Það er því búið að æfa leikrit um andvaka prinsessu (var næstum búin að skrifa andvana...) - og spennta bændasyni...

Sú breyting hefur þó orðið á mínum högum sem íslenskukennara að ég þarf ekki að eyða dýrmætum mínútum í stress fyrir samræmd próf - og missi ekki dýrmæta daga úr kennslu í þau heldur. Svona er Ísland í dag.

Nú stendur mikið til hjá okkur í kirkjukórnum, fyrir utan hefðbundið páskastúss, en við erum búin að vera að æfa Jesus Christ Superstar undanfarið (ásamt fleira góðu fólki) og ætlum að syngja þetta allt saman á annan í páskum og þann þriðja líka.
Alltaf gaman í sveitinni.

Ég ætla annars á tónleika með Eivöru á sunnudaginn - með 8 góðum vinkonum og á von á frábærri skemmtun.
Ég er svo á leið á Akureyri á miðvikudaginn til að sjá leikritið Fúlar á móti með bankastarfsmönnum á Blósinu góða og hlakka óskaplega mikið til því mér skilst að maður hlæi sig máttlausan yfir vitleysunni sem uppúr þeim stöllum vellur.

Á fimmtudag stendur til að renna til höfuðborgarinnar og mæta í eins og eina fermingu hjá bróður mömmu og bruna svo beina leið heim aftur því ég ætla að syngja með kórnum á föstudaginn langa. Þá eru lesnir Passíusálmarnir í kirkjunni (eitthvað af þeim í það minnsta) og svo æft fyrir páskadagsmorgun. Annars held ég upp á eins árs afmæli með kirkjukórnum þessa páska og sé ekki eftir einni mínútu - ekki amalegt það.

Jæja, nóg í bili - hér eru allir hressir að vanda og þokkalega ánægðir með þessa konu því ég tók mig til og steikti kleinur í annað skipti á æfinni í dag. Hið fyrsta var með Lindu Rut uppúr tvítugu... Held bara að árangurinn hafi verið bærilegur - í það minnsta er stefnt að frekari afrekum á þessu sviði.
Bestu páskakveðjur til ykkar allra - vonandi náið þið að eiga góðar stundir í góðra vina hóp þessa dagana.

Berglind bissywoman...